Telangana Political Tensions Rise : కేంద్ర, రాష్ట్ర ప్రభుత్వాల నిర్ణయాలతో తెలంగాణలో రాజకీయ వేడి మరింతగా పెరిగింది. నేవీ రాడార్ స్టేషన్ ఏర్పాటు గురించి కేటీఆర్ చేసిన ట్వీట్ ఇప్పుడు చర్చనీయాంశంగా మారింది. నేవీ రాడార్ కేంద్రం ఏర్పాటుపై తన అభ్యంతరాలను వ్యక్తం చేస్తూ, మూసీ నది పరిరక్షణ కోసం సీఎం కృషి చేస్తున్నప్పటికీ, మరోవైపు సుందరీకరణ ప్రాజెక్ట్‌కి ప్రాధాన్యం ఇస్తున్నారని ఆరోపిస్తూ కేటీఆర్ ప్రశ్నలు సంధించారు. పదేళ్లుగా తమపై ఒత్తిడి తెచ్చిన రాడార్ స్టేషన్ నిర్మాణానికి తాము అనుమతిని నిరాకరించామని కేటీఆర్ పేర్కొన్నారు.
దీని పై ముఖ్యమంత్రి కార్యాలయం వెంటనే స్పందించింది. సీఎంఓ ఒక ప్రకటన విడుదల చేస్తూ, కేసీఆర్ ప్రభుత్వం గతంలో ఈ ప్రాజెక్ట్‌కు తుది ఆమోదం తెలిపిందని గుర్తుచేసింది. 1980 అటవీ సంరక్షణ చట్టం సెక్షన్-2 ప్రకారం, విశాఖపట్నంలోని ఈస్టర్న్ నేవల్ కమాండ్ ప్రధాన కార్యాలయానికి అనుకూలంగా బీఆర్ఎస్ ప్రభుత్వం ఆమోదం ఇచ్చిందని పేర్కొంది. గతంలో ఆమోదం తెలిపిన ప్రాజెక్టును ఇప్పుడు కేటీఆర్ వ్యతిరేకిస్తుండటం ఆశ్చర్యకరమని పేర్కొంది. దేశ భద్రతకు సంబంధించి ప్రాజెక్టులను వ్యతిరేకించడం కేటీఆర్ రాజకీయ ప్రేరేపింతను చూపిస్తుందని సీఎంఓ వ్యాఖ్యానించింది.
విశాఖపట్నం కేంద్రంగా పనిచేస్తున్న ఈస్టర్న్ నావల్ కమాండ్, వికారాబాద్ జిల్లాలోని దామగుండంలో వీఎల్ఎఫ్ రాడార్ స్టేషన్ను నిర్మించాలని నిర్ణయించింది. ఈ ప్రాజెక్ట్ కోసం 2017 మార్చి 2న నేవీ విభాగం రాష్ట్ర అటవీ శాఖకు రూ.133.54 కోట్లు జమ చేసింది. 2017 డిసెంబర్ 19న జీవో నెం.44 ద్వారా నేవీకి అటవీ భూములను బదిలీ చేసినట్లు సీఎంఓ తెలిపింది. వీఎల్ఎఫ్ అంటే వెరీ లో ఫ్రీక్వెన్సీ రాడార్ అని, ఇది సముద్రంలోని ఓడలు, జలాంతర్గాముల్లోని సిబ్బందితో సమాచారాన్ని పంచుకునేందుకు ఉపయోగిస్తుందని వివరించింది.
ఇప్పటివరకు వేదిక సిద్దమవడంతో ఈ నెల 15న రాడార్ స్టేషన్‌కు శంకుస్థాపన ముహూర్తం ఖరారు చేశారు. హైదరాబాద్‌కు 70 కిలోమీటర్ల దూరంలో ఉన్న వికారాబాద్ జిల్లా దామగుండం అటవీ ప్రాంతంలో 3,260 ఎకరాల భూమి ఉంది. ఇందులో 2,900 ఎకరాలను నేవీకి అప్పగించారు. ఈ భూముల్లో లక్షా 93 వేల చెట్లు ఉన్నట్లు గుర్తించారు. అటవీ శాఖ అధికారులు, అవసరమైతే తొలగించాల్సిన చెట్లను జాగ్రత్తగా ఉన్మూలనం చేసి వాటిని గడ్డిభూముల్లో నాటాలని యోచిస్తున్నారు.
భారత నావికాదళం 14 ఏళ్ల ప్రయత్నాలు విజయవంతమవుతున్నాయి. అక్టోబర్ 15న వికారాబాద్ జిల్లా దామగుండం అటవీ ప్రాంతంలో రాడార్ స్టేషన్‌కు ముఖ్యమంత్రి రేవంత్ సమక్షంలో కేంద్ర రక్షణ శాఖ మంత్రి రాజ్‌నాథ్‌ సింగ్‌ శంకుస్థాపన చేయనున్నారు. అయితే, రాడార్ స్టేషన్ ఏర్పాటుకు సముద్ర తీర ప్రాంతం అనుకూలం. కానీ తెలంగాణలో రాడార్ స్టేషన్ ఏర్పాటు చేయడంతో ప్రతిపక్షాలు వ్యతిరేకిస్తున్నాయి. ఈ నిర్ణయం మూలంగా అటవీ సంపద నష్టపోతుందనీ, మూసీ నది మనుగడ ప్రశ్నార్థకం కానుందనే వాదనలు ప్రతిపక్షాలు తెరపైకి తీసుకొస్తున్నాయి. దామగుండం అటవీ ప్రాంతం ఈ వివాదంతో మరింత వేడి పుట్టించబోతోందా? మూసీ నది భవిష్యత్తు ఏమిటన్నదే ఇప్పుడు హాట్ టాపిక్.
CM Revanth Reddy : రేవంత్ రెడ్డికి ఢిల్లీ పోలీసుల నోటీసులు